Lojrat Olimpike Speciale sërish në Shqipëri prej Fondacionit Vodafone Albania

Lojrat Olimpike Speciale vijnë për të tretën herë në Shqipëri të mbështetura sërish nga Fondacioni Vodafone Albania.  Lojërat Olimpike Speciale, këtë vit do të zhvillohen në datat 1, 2 dhe 3 qershor 2010 dhe në  to do të marrin pjesë 250 atletë të ndarë në 14 skuadra nga 11 rrethe të vendit, të cilët do t’i bashkohen mbi 2.200.000 atletëve të tjerë që janë pjesë e kësaj iniciative olimpike globale.

Sot, datë 1 qershor në ditën e parë të Lojrave Olimpike Speciale, Presidenti i Republikës Bamir Topi do të përshëndesë të gjithë pjesëmarësit dhe do të shpallë fillimin e lojrave përmes ndezjes simbolike të Flakës Olimpike, e cila do të nisë rrugëtimin e saj prej Presidencës, për të vijuar përgjatë Bulevardit “Dëshmorët e Kombit”, Sheshit Skënderbej, Rrugës së Durrësit dhe në fund të “shtegtimit” të saj, Flaka Olimpike do të mbërrijë pranë Qendrës Sociale “Don Bosco” ku do të fillojnë garat.

Lojrat Olimpike Speciale këtë vit përfshijnë 6 disiplina sportive: basketboll, futboll, atletikë, ping-pong, bowling dhe not. Sot, në pasditen e parë të aktivitetit, pjesëmarësit do të kenë mundësi të argëtohen me lojrat dhe programin festiv, falë mbështetjes së një numri të madh vullnetarësh nga  Korpusi i Paqes në Shqipëri (Peace Corps Albania), animatorëve socialë të Qendrës Sociale “Don Bosco”, pjesmarrësve të programit të Vullnetarëve të Kryqit të Kuq Shqiptar, si dhe prej shumë vullnetarëve punonjës të shoqërisë “Vodafone Albania” Sh.A.

Qëllimi themelor i Lojrave Olimpike Speciale është thyerja e pengesave ndërmjet individëve me dhe pa aftësi speciale përmes integrimit të tyre në aktivitete të përbashkëta sportive. Gjatë tre viteve të fundit Fondacioni Vodafone Albania ka punuar me kujdes të veçantë për personat me aftësi speciale, duke bashkëpunuar ngushtësisht me organizata dhe institucione të tjera si Olimpiku Special Shqiptar, Komiteti Olimpik Kombëtar Shqiptar, Qendra Sociale “Don Bosco” si dhe me një rrjet të gjerë vullnetarësh, bashkëpunëtorësh dhe aktivistësh të shoqërisë civile.

E veçanta e këtij viti për atletët me aftësi speciale është se në sajë të mbështetjes financiare të Fondacionit Vodafone Albania një delegacion i tyre  do të  përfaqësojë Shqipërinë në Lojrat Olimpike Speciale Ndërkombëtare që do të zhvillohen në muajin shtator në Varshavë, Poloni.

Fondacioni Vodafone Albania i fton të gjithë të bashkohen dhe të mbështesin lëvizjen e Olimpikut Special Shqiptar nën moton “Sporti nuk njeh barriera. Bëhu edhe ti pjesëmarrës. Bashkë do të jemi më mirë e më shumë.”

 

Për më shumë informacion, lutemi kontaktoni:
Tel: +355 4 223 83 214
Fax: +355 4 223 83 331
e-mail: media.al@vodafone.com
http://www.vodafone.al/